{{ حلمك ياسى يوسف }} بقلم يوسف عبد اللطيف

بحلم بيوم فيه صفا
ومفنجل انا عيوني
يمكن اشوف الوفا
وساعتها ترتاح جفوني
شوفت اللي نوره انطفا
واللي اتولد في الخفا
واتحرم من كلمة ضيا عيني
شوفت الغلابة والناس الطيبين
واللي باع الوهم والهوا والطين
وقابلت الصبية البهية
شمسها دفا الشتوية
عودها ملفوف ولا الدايرة
سكر وحليب صافي وعافية
شوفتها ودموعها ملو العين
بملايه لف وساعات بجلابية
كانت في الصبح هادية
والضهر بقت شقية
كلمت الشريف والعفيف
واللي اتحبس علشان رغيف
والحرامي اللي اكل حقنا
وعمل من اموالنا تكية
في الحلم كان حرامي الحله
واللي سرق احلامنا واتسلى
هفضل احلم واكلم واقول
اصل الكلام في الحلق شوك
والسكوت بقى زي الموت .