وَفاة المدرسة:
يْكْرْكْرْ فْالمْدْرَسَة العِلْمْ عْنْدُو زَايْدْ
يْقُولْ كْلاَمْ يْضْرّْ صَارْ بِينَّا سَايْدْ
لّي قْرَاوْا آ شْنُو قْضَاوْا
الْجَهْلْ هُوَ لِّي رَائِدْ
يْكْرْكْرْ يْتْكْلّْمْ وْ الأسْتَاذْ كِي طَبَاشِيرْ
الأُسْتَاذْ لِّي يْعْلّْمْ يْحْنْسْرُوهْ تْحْنْسِير
وْ هَذَا فْرَاسُو تْقْرَا آشْ هَا دِّيرْ
تْلْقَى الْخْدْمَة مُحَالْ فْطْرِيقْهَا رَاكْ تْحِيرْ
هَذَا يَائْسْ مْنْ الأوَّل
يْعَارْفْ غِيرْ المْصَاحْبَة وْ النِّسْيَانْ بْالتّْخْدِيرْ
يْتْفْلَّى يْدُوزْ الوْقْتْ بْالْبْسَالَة دِيمَا يْطِيرْ
مْتْيْقّْنْ مْنْ نْفْسُو يْقُولْ الْقْرَايَة مَا فِيهَا خِيرْ
أَنَا وِيَّاكْ فْصْمْتْ وْ الْجَهْلْ فْخِيرْ وْ خْمِيرْ
وْ الصّْمْتْ عْلاَ وْ عْلاَ وْ الضَّمِيرْ عَايْشْ ضَرِيرْ
مَا بِينْ الْحَقّْ وْ الْبَاطِلْ صِرَاعْ فْالدّْنْيَا كْبِيرْ
الْمْدْرَسَة تْمْشِي بْعْكَّازْ عَجُوزَة صَارْتْ تْنْدَاسْ
بْشَرَفْ وْلاَدْهَا فَازْ جَاهْلْ كْلْخْ الرَّاسْ
كَانْتْ هِيَ عْكَّازْ حْرُوفْ تْفُوقْ الْمَاسْ
وْ أَعْدَادْ تْلْمْعْ نْجُومْ دَايْرِينْ بِهَا حُرَّاسْ
وْ فِكْرَة تْوْلْدْ أَفْكَارْ تْعِيدْ للعِلْمْ أَنْفَاسْ
الْمْدْرَسَة دْمُوعْهَا بْحُورْ ضَاعْ مْنّْهَا الْحَمَاسْ
خْنْقْهَا جَاهْلْ ظَالْمْ وْ افْتَرْسْهَا افْتِرَاسْ.
........................من توقيع/الخائف من الظلم المهدي العمري.
إرسال تعليق