{{ باب التحرير }} الشاعر أبو عمار المصرى

وعيونى بتنبش
طراطيف الفكرة
عمالة تدور على بكرة
وسط الفوضى
يتبعزق ورق الشجر الطاير
يفرش كل الأرض
يتبعتر خوف العصافير
مع طلقة غدر ..ورعد... وبرد
والمح وسط وشوش الناس
حبة عضم ..مفكك ..سايب
مكسى بورقة جلد مكرمش
متحزم بعروق زرقانة
صوت جواه ..
مسلوخ فى الحلق
يلمع ورق الشجر الناشف
تحت البرق
يتمدد جوايا شياط
ويرسب فى وريدى ..وجع
يخرج صوت من بين أصوات
مشبوكة ..
فى حبل كلام
إتسـكـَّع مرة لقـُدّام
إخلع نفسك ...من جب الموت
إخلع روحك ...من عفن النوم
وانا باهرب من نزناز النفس
عكس القوانين والجاذبية
باتشعبط فى خيوط الشمس
تحاوطنى الفكرة
وتناغش عقلى وتكوينى
وتلفلف تلافيف القلب
وتنخور فى خلايا الروح الهربانة
ويا العصافير
أتكـوّم على صدر رصيف
مقسوم نصين
كفة إيد العضم السايب
بتطبطب على كتفى الدايب
قوم من تانى