{{دنيا}}بقلم محمد عسل

دنيا وقلبها دايماً خالي..

بس بتعشق للدوران..

تِدي رخيص ف بيصبح غالي..

بس غلاوتُه بدون أتمان..

تِدي الواطي ف يصبح عالي..

بس الواطي أكيد خسران..

ممكن حد بعقل كَسيح..

يصبح فيها مُدير كسبان...

ممكن عقل نبيه وفصيح..

يصبح فيها وحيد حيران...

ممكن تلقي الظالم عايش..

واكل شارب بالمجان..

ممكن تلقي فقير مش لاقي..

زارع شهد لكنه جعان...

دنيا وفيها الهَم كتير..

دنيا مصير دناوتها تبان..

ممكن تلقي ضعيف امبارح..

أصبح واحد م الشُجعان..

ممكن تلقي وزير أو قاضي..

داخل سجن يعيش مِتهان..

ممكن تلقي القلب الفاضي..

سَكَنُه الحب وبقي مليان..

دنيا بجد حقيقي غريبه..

دنيا عجيبه ماليها أمان...

تعشق فيها وتجري وراها..

تبقي وقعت ف بير حرمان..

تهرب منها تروح تلقاها..

فاتحه الحُضن بشوق ولهان..

دنيا وربك بيبَدِلها..

دنيا رخيصه ماليها أمان.