التورتة جاهزة بقلم الشاعرد. عمر عبد الجواد

.......التورتة جاهزة.........
التورتة جاهزة يا عمه
كل واحد فينا ياخد منها قطمة
يلا يا زين.....يلا يا حسين
اعملولكم حبة همة...
يلا يا مينا.......يلا يا لينا
وانتي كمان يا فاطمة
مدوا اديكوا ..الناس حواليكوا
و عيونها عليكوا.. يلا قبل الزحمة

زين قال.. تورتة ايه؟
اللي عامل عليها لمه
انتو ما عندكوش دم
ولا في عروكم ميه مش دم...؟
راحت فين الرحمة ؟
الارض ميمونة.. بس التورتة ملعونة
بالدم معجونة
وكتير عليها لامونا
و تصير في حقنا وصمة
أبوس اديكوا..يهون عليكوا
دم زينة و مبروك و رحمة ؟

وحسين قال.. يا ناس حرام
شبعنا عتاب و ملام
....وكتر الكلام عملي أزمة.....
اللي ف الشتا شفناه نضيف
وقلنا عليه عفيف..لما حل الصيف
قهرني و جابلي صدمة

ولينا قالت.. احنا ولاد الزوات
كله إلادا ..اخدنا حقنا وزيادة
أهالينا عليهم القطر ..فات
ملاقيين غير الفتات وتسترهم الهدمة
وغيره ع الرصيف بيبات
ومش لاقي غير الرغيف
و ينام ديما خفيف... .ويقول دي أكبر نعمة

ومينا قال ...ابانوب عشانها
مات شهيد....و الرب عليا شهيد
ما تتمدلي ايد إلا في يوم العيد
ونكون كلنا صحبة ولمة

وفاطمة قالت.. أخويا دماه سالت
ولا يوم روحه علينا هانت
وبدل القطمة.................. اخدت كام لطمة.

وهما لسه بيتعاتبوا
وكل واحد همه واجبه
ولا حد فيهم خان صاحبه ...
ولا فكر يلاعبه ويجري ياخد نايبه

سمعوا أصوات من بعيد
بتصرخ وتقول يا عبيد
التورتة دي مش من حقوا
و لا ييجي يوم و تملكوا
التورتة دي مش للضعيف .
.ولا للفاكر نفسه منكم شريف
التورتة دي من حقنا
احنا و بس اللي هنا
وان حد فيكو فكر يمدلها إيد
هنضربه و بقلب قاسي من حديد

ردوا كلهم و بعزم شديد
وكأنهم رجل واحد اكيد
احنا معاك يا ابن البلد
بادينا واصواتنا نحفظ حق الولد
اللي غرق..واللي اتحرق ...واللي مات شهيد ؟؟

د / عمر عبد الجواد