***
يا وجع قلبى ..
كأنك يا ابنى من صلبى ..
مقدّر يتوجع قلبى ..
واموت اليوم بدمعاتى ..
وأصلى .. بتدعى آهاتى ..
و استغفر ..
سامحنى يارب ..
ضاق صدرى ..
وده ذنبى ..
يضيق الصدر و يعافر ..
وتطلع صرخة من جنبى ..
أجرنى من عذاب .. قلبى ..
وخفف حزنى ياربى ..
***
كأنك يا بنى من صلبى ..
بترضع من وداد حبي ..
كأنك يا بنى من صلبى ..
وميّت بكرة متخبى ..
كان الدنيا يوم موتك ..
بتجمع حزن .. و تعبّى ..
ف تطلع صرخة من جنبى ..
ضنا قلبى ..
***
ضنا قلبى ..
لا شوفتك يوم ولا حضنتك ..
ولا دمّعت ف كفوفك ..
ولا لمستك ..
ضنا قلبى ..
كانى بجرى ع الصورة ..
وانا الملهوف ..
احاوطك زى عصفورة ..
بتوب الصوف ..
انشف شعرك المبلول ..
اغير هدمتك م الخوف ..
واشيلك لجل تدّفى ..
و انفض عنك الرمله ..
ف حضنى تبقى ملو الشوف ..
اصبر نفسى .. من قربك ..
و من قربى ..
كأنك يا بنى من صلبى ..
***
ضنا قلبى ..
مانيش فاكر ف وقت الموت ..
حضنتك ولا كفنتك ..
و سيبتك ولا ودعتك كده بسكوت ..
سنين بتعدى .. و تفارق ..
كده ف سكوت ..
بتنقش ع الكفوف سكة ..
وقهر و ظلم متخبى ..
ف وسط خطوط ..
كأن سنينك النونو ..
سنة ؟؟ سنتين ؟؟ ..
بتبكى عمرنا و تفوت ..
بتنده دمعه مسجونة ..
تسيبنا ف زحمة الملكوت ..
ف ننده تلتفت و تفوت ..
تسيبنا ..
وتفضل موته تتهادى ..
بتحضن ذلنا ف شطوط ..
فى عتمه ظلم متفرق ..
مع الجبروت ..
و يظهر كل متشوه ..
و متخبّى ..
ضنا قلبى ..
كأنك يا بنى من صلبى ..
***
سامحنى ياللى مش عارف ..
حروف اسمك ..
سامحنى مكنتش اتخيل ..
حدود همّك ..
وعشت سنين وانا عادى ..
وسايب مين اباح دمك ..
بلاش تصحى ..
و سيبنا ف دنيا ملعونه ..
بلاش تصحى ..
و سيبنا لـ دنيا مجنونه ..
جزاءنا نعيش و نتباكى ..
رؤوسنا تملى مدفونه ..
ما ده العادى ..
ما كان الدرة من قبلك ..
والف و الف من بعدك ..
عشقنا العيشه ف الوحله ..
و كنا بنفتكر ننسى ..
اكيد سهله ..
يا ابيض زى لون الورد ..
وشفاف زى لوح التلج ..
مفارق دنيا تلعب بى ..
وسايب وحلة توسمنى ..
و سايب آهه .. تقسمنى ..
لا تحزن لى ..
لا تحزن بى ..
سامحنى .. يا ضنا قلبى ..
كأنك ..
يا بنى من صلبى ..
***
طارق المملوك
3/9/2015
إرسال تعليق