{{{ أنا ذنبي إيه }} .. بقلم الشاعر الأستاذ / رضا أبو الغيط

انا ذنبى ايه
ف اللى انتوا فيه
علشان أموت كده ع الشطوط
وابويا تشكى دموع عينيه
انا ذنبى ايه
انا ذنبى ايه

أنا فرع أخضر ف الشجر
يا قلوب وأنشف م الحجر
وكلامى ليكوا مختصر
أنا لسه بسأل يا بشر
كان ذنبى ايه
كان ذنبى ايه

الموجه شايله جثتى
صعبان عليها ضحكتى
رغم انى انا مش ابنها
سامع انين صوت قلبها
على اللى مات وف حضنها
عماله تصرخ ف البشر
كان ذنبه ايه
كان ذنبه ايه

ذنبى انى سورى ياعرب
وحلمت أسكن حضنكوا
بعد ماتت يوم حلب
ودمشق ضاعت منكوا
انا اللى عشت بحبكوا
وجثتى على أرضكوا
انا لسه س بسأل ياعرب
كان ذنبى ايه
كان ذنبى ايه

غرقان ف بحر من الخلاف
عطشان وحاسس بالجفاف
عشت الحياه بين آه وآه
مش لاقى طوقى للنجاه
واخويا وأمى اتفرقوا
و بيغرقوا ف بحر الحياه
وانا لسه باأسأل يا بشر
كان ذنبى ايه
كان ذبى ايه

صورتى احفروها ف ذهنكوا
يمكن تفوقوا لرشدكوا
يمكن تتوبوا لربكوا
يمكن تحسوا بشعبكوا
يا اللى الكراسى ع المأسى تهمكوا
انا منكوا انا ابنكوا
ولسه بسأل يا عرب
كان ذنبى ايه
كان ذنبى ايه

كلمات /رضا أبو الغيط