{{ وقالى ياصغيرة .. قلبك صغير }} بقلم الأستاذة إيزيس غانم

وقالّى يا صغيّرة...
قلبك صغير..
حبك صغير..
فإزاى هغيّر...مقداف سفينتى
وارسى بين مينة عينيكى؟؟
إزاى هامد إيديه وأخدك من إيديكى..
وأنا حاسس إنى ..كل عين ..
بتبص مره عليّا..ومرتين بصّين عليكى..!!
إزاى يا أصغر ورده ف جنينة حياتى..
أشمّ وردك..وأبدر الأشواق عليكى..
وأنا حاسس إن مدافع اللوام
محاصرنى لومها...!!
كأن عمرى كبير عليكى..
فعودى للعمر المناسب ..
إبعدى شياطين شقاوتك..
سيبى إيدى من إيديكى..
لسّه عمرك ع الخدود..
موجود..ومش موجود..!!
لسه ماكمّلش فيكى ..
خرّاط صفاتك أحلى عود..
لسّه مالوّنش خدّك ...
من كاسات شهد الورود..!!
فعودى للحلم الصغيّر,,,,,
وإفرشى منديلك الأخضر عليه..
قولتله ..طيب وليه..؟
هو إنت عمرك أد إيه..؟
قالّى عمرى ضعف عمرك..ويزيد عليه..
قولتله طب فيها إيه؟
قاللى لسه بتسألينى ؟
قولتله مسألشى ليه؟
الحب عمره ماكانله عمر
هتحاسبنة ع العمر ليه؟
قالّى اسكتى ..كسرتى فيّا الرد..
وبكل حب رديت عليه..
اللى انكسر فيك إتبنى فيّا وعلا..
فعلّى معمارك عليه ...
لسه النهار ف عينيك بيضحك..
تحرمه م الشمس ليه..؟
خد من ضلوعى شمس
واصنع شمسين لقلبك...
شمس لما احبى وأجيلك ترفعنى ليك..
والتانيه تعصر شهد روحى ..
وم العطش ...ترويك...!!