لما شمس الكون تهل
كلمات الشاعر / رضا أبو الغيط
******************************
لما شمس الكون تِهل
فوق حيطان بيتنا القديم
كان بيلبس أحلى تُل
ويبقى أجمل م الحريم
كان بيضحك ويلاغينى
لما ألعب ويا أخويا
كان يبوسنى من جبينى
لما أبوس ايدين أبويا
كان بيفرح لما بفرح
والحيطان تتحنى فرحه
ولما أفكر يوم وأسرح
تلقى بيتنا عيونه سارحه
بيتنا كان من طوب وطين
أما سقفه كان بغاب
بس كان راسى ومتين
أقوى من كل الشباب
بيتنا ما كان فيه مكيف
بس كنت ف حُضنه أصيف
بيتنا دايما كان حنين
ع اللى فيه قلبه رُهيف
أصل بيتنا حته منى
واللى منى نسمه فيه
صعب يبعد بيتنا عنى
طول ما انا ماسك ايديه
لما كنت أحب أشتى
ألقى قاعه وتلاقينى
بالحنان دى كات تغطى
كل أيامى وسنينى
كنت أسيب ع القُبه همى
وأجرى وألعب ف الغيطان
طول ما كنت ألاقى أمى
كنت با أشعر بالأمان
بيتنا كان مفتوح تملى
ذى قلب العاشقين
عمر بابه يوم ما قالى
لما أخبط انت مين
بس كان لازم أخبط
أصل دى سنة نبينا
بس خايف بكره أغلط
لما أسكن ف المدينه
*********************
إرسال تعليق