مسحراتى وحياتى
روح على كــفـى
سهران ليالى وخطاوى العمر
ما تكفى
أقول يا بلدى
سجنتى ولدى
ودمى متصفى
كان فين اخويا
جات له رصاصة
شلته على كتفى
أجرى وانادى
أحرار بلادى
مسجونين فى حديد
سجان وناوى
نية بلاوى
يقتل غناوى العيد
كل الحكاية ..
رفعنا راية وقلنا
حرية
غراب ونافش علينا ريشه
وبلدى مش ليا
ولعبوا لعبة
علينا صعبة
عسكر وحرامية
مسحراتى ولسة واقف
ما يميلشى صبرى
ولما بانوى ترجع لى بلدى
شامر دراعى واخش قصرى
وادق طبلى
والعيش يطيب لى
لو حتى حاف
فارش فى أرضى
حافظ لعرضى
وانام سمايا غطا ولحاف
نادى وانادى
والحس عالى
كل الليالى نجوم تلالى
ع اللى قبالى واللى بعيد
الزرعة غلة
فى أرض بور
والحر يزرع بدمه نور
والموت تقاوى
يزرغها غاوى
وانا شعبى جامد
ولا الصخور
مسحراتى واصحى يا نايم
شوف اللى ثاير
والدم فاير
يكتب بدمه
خطوط لحلمه
يهد سجنه
يعبر معابر
إصحى يا نايم
وحد الرزاق
إرسال تعليق