على بعد رصاصة / بقلم الشاعر فتحي حمدالله

على بعد رصاصة
فتحي حمدالله
على بعد سيجارة
وكباية شاي
فوق كرسي قديم ومهكع
وفى قهوة حقيرة في شارع سد
نايمة الأحلام
فوق ريش طواويس الليل
والليل نسناس بردان
متغطي بضحك الناس
فى سيرك الوطن الهش
على بعد رصاصة
وسط حجارة
ورشة دم
فوق ارض بتعشق
طحن العضم
وتغنى بحس غويط
آخر غنيوة حزن
فى شارع هزايمنا المفرود
على بعد حروف
أنشف م الصخر
واقفة فلسطين
فاردة الدراعين
مصلوبة ف جذع نخيل عروبتنا
ويهوذا اللى بيجرى
فى دم العسكر
ندمان
عدمان تبرير
مركون
جنب البدل الكاكى المكوية
ف دواليب الفرسان