كلام ... فاضى
**********
سيدى الدرويش بيقول
إن اللى بيزرع أرضه
ما يتهتك عرضه
واللى بتقلع توبها فى الخلا
يطلع لها
جنى وخبيث
ما بتشوفوش
بس النهاية المؤلمة
يسكنها رغمن عنها
ويمارس الفحش المدارى غلطته
جوة انهزام الروح
تحبل
أباليس كتير تتولد
حكايات قديمة تتحكى
عن جنى ...يتلون
وانا جدى كان دون
من ألف عام
قبل الميلاد
جنى وساكن فى البلاد
فى جزيرة مهجورة
كان كل يوم
بيغير الصورة
يطلع فى عز الضهر الاحمر
ويحبل الرملة
ويستحمى
بدم العيال البكر
ياكل فى زرعتنا
وان يوم دلوك
على سر التعويذة هناك
إرجع ومعاك
وقية من شعاع الشمس
وقيتين ..زهر المريخ
وشوية بصاغ
من هبوب الريح
وف هون باش قعره
من كتر الدق
على دماغه
إخلطهم مع نور قنديل
وخد المسحوق
على نار هادية
كحـَّـل منه عيون الدنيا
وارسم حواجبها
بالحب ...الخوف
تعبت هدومى
من كتر الكلام والشوف
وعلق الزينة
جوة الحكاوى الممكنة
دق الحديد ع الحدود
شيل الرايات السود
غريبة الألوان
إزرع راياتك فى ذاتك
تطرح رايات ياما
لا تدق زار ..
ولا تولـّـع بخور للحور
الجنى دة ...أصله ابن حنت
وواد خلاصة وعفركوش
من صغر سنه
وهو راضع ...أبلسة
وطـِّـى الصوت
الدنيا سكوت
إنحت فى جبال الصبر بيوت
لفلف من شرق لغرب وفوت
على كل قبور السلف الصالح
فتش فى حوارى الملكوت
إسأل واتعارك واتصالح
دور فى الكتب المنهوشة سطورها
على وصفة جديدة وتعويذة
أو شغل جلا
أو حتى طريقة جديدة
وتعمل بيها حجاب
لبسـُه للبنت ال.. كانت
قالعة توبها فى الخلا
يمكن يكون فيه الشفا
ويخرج الجنى اللى ساكن
فى الحوارى والأماكن
البنت ضعفت
والجنى ساحب من وريدها
الروح
مش مشكلة ..لو ساب جروح
مصيرها تتعافى
ماهى طينة ...شفافة
هتلملم التراتيل
وتجمع القرآن
م الفجر هنرتل
سورة يس والتين
وآيات من الرحمن
...........
بــقــــلــــــــم ا لـــشـــــــا عــــــــــر
أ بــــــو عــــمـــــــــا ر ا لـــمــــصــــــــر ى
إرسال تعليق